Pushpa-2: బాలీవుడ్‌లో రికార్డుల మోత మోగిస్తున్న ‘పుష్ప-2’

ఐకాన్ స్టార్ అల్లు అర్జున్ – బ్రిలియంట్ డైరెక్టర్ సుకుమార్ కాంబోలో వచ్చిన పుష్ప-2 సినిమా రికార్డులు తిరగరాస్తోంది. తెలుగుతో పాటు హిందీలోనూ ఈ సినిమా కలెక్షన్ల సునామీ సృష్టిస్తోంది. ఇప్పటికే అత్యంత వేగంగా రూ. 1000 కోట్లు వసూళ్లు రాబట్టిన ఈ సినిమా తాజాగా మరో రికార్డును కూడా నమోదు చేసింది. ఇప్పటివరకూ ఈ సినిమా రూ.507.50 కోట్ల (కేవలం హిందీ మార్కెట్‌) నెట్‌ కలెక్షన్స్‌ వసూలు చేసింది. హిందీలో అత్యంత వేగంగా రూ.500 కోట్ల క్లబ్‌లోకి అడుగుపెట్టిన చిత్రంగా ఇది రికార్డు సృష్టించింది. ఈ విషయాన్ని చిత్రబృందం తెలియజేసింది.

3డి వెర్షన్‌లో కూడా..

కాగా.. 2021లో విడుదలైన ‘పుష్ప: ది రైజ్‌’కు కొనసాగింపుగా ‘పుష్ప 2: ది రూల్‌’ రూపుదిద్దుకుంది. మైత్రి మూవీ మేకర్స్‌ పతాకంపై దీనిని నిర్మించారు. ఫహాద్‌ ఫాజిల్‌, అనసూయ, సునీల్‌, జగపతి బాబు కీలకపాత్రలు పోషించారు. పుష్ప రాజ్‌గా అల్లు అర్జున్‌, శ్రీవల్లిగా రష్మిక నటన అందరినీ ఆకట్టుకుంది. ప్రపంచవ్యాప్తంగా డిసెంబర్ 5న ఈ సినిమా విడుదలైంది. విడుదలైన ఆరు రోజుల్లోనే రూ.1000 కోట్ల గ్రాస్‌ వసూలు చేసి సరికొత్త రికార్డులు సృష్టించింది. మరోవైపు, ‘పుష్ప 2’ 3డి వెర్షన్ కూా అందుబాటులోకి వచ్చింది. హైదరాబాద్‌లోని పలు థియేటర్లలో 3డి వెర్షన్‌లో సినిమా చూడొచ్చని టీమ్‌ తెలిపింది.