
Kolkata Rape Case: కోల్కతా వైద్యురాలి అత్యాచారం కేసులో దోషికి జీవిత ఖైదు!
దేశవ్యాప్తంగా సంచలనం సృష్టించిన కోల్కతాలోని ఆర్జీ కర్ ఆసుపత్రిలో వైద్యురాలి అత్యాచారం, హత్య కేసులో సీల్దా కోర్టు కీలక తీర్పు వెలువరించింది. దోషిగా తేలిన సంజయ్ రాయ్కి జీవిత ఖైదు పడింది. అతడికి రూ.50 వేలు జరిమానా కూడా విధించింది. అంతేకాదు బాధిత కుటుంబానికి రూ.17 లక్షల పరిహారం ఇవ్వాలని పశ్చిమ బెంగాల్ ప్రభుత్వాన్ని కోర్టు ఆదేశించింది. అయితే, కోర్టు తీర్పుపై బాధిత కుటుంబ సభ్యులు అభ్యంతరం వ్యక్తం చేశారు. దోషికి మరణశిక్ష విధించాలంటూ వైద్యురాలి తల్లిదండ్రులతో పాటు పౌర సమాజం డిమాండ్ చేస్తోంది.
తీర్పు వెలువరించిన సీల్దా కోర్టు!
కాగా, గత ఏడాది ఆగస్టు 9వ తేదీ రాత్రి ఆర్జీ కర్ ఆసుపత్రి సెమినార్ రూమ్లో ఒంటరిగా నిద్రిస్తున్న జూనియర్ వైద్యురాలిపై జరిగిన హత్యాచార ఘటన యావత్ సమాజం తల దించుకునేలా చేసింది. ఈ ఘటన పట్ల దేశవ్యాప్తంగా తీవ్ర నిరసనలు జరిగాయి. ఘటన అనంతరం ఆసుపత్రి ఆవరణలోని సీసీటీవీ ఫుటేజ్ ఆధారంగా నిందితుడు సంజయ్ను ఆగస్టు 10న కోల్కతా పోలీసులు అరెస్ట్ చేశారు. అనంతరం ఈ కేసును సీబీఐ విచారించింది. దీనిపై గత వారం విచారణ జరిపిన కోల్కతాలోని సీల్దా కోర్టు.. సంజయ్ రాయ్ని దోషిగా నిర్ధారించింది. ఈ మేరకు ఇవాళ దోషికి శిక్ష ఖరారు చేస్తూ తీర్పు వెలువరించింది.