AP Cabinet: ఏపీ కేబినెట్ తీసుకున్న.. కీలక నిర్ణయాలు ఇవే..!

ముఖ్యమంత్రి వైఎస్‌ జగన్‌మోహన్ రెడ్డి అధ్యక్షతన జ‌రిగిన ఏపీ కేబినెట్‌ సమావేశం ముగిసింది. ఈ సమావేశంలో పలు కీలక నిర్ణయాలు తీసుకున్నారు. ఈ క్ర‌మంలో పలు కీలకమైన బిల్లులకు ఏపీ కేబినెట్‌ ఆమోదం తెలిపిందని స‌మాచారం. అజెండాలో ఉన్న ప్ర‌ధాన‌మైన అంశాల‌పై చ‌ర్చ జ‌రిగిన‌ట్లు తెలుస్తోంది.

మంత్రివ‌ర్గ స‌మావేశంలో ముఖ్యంగా మూడు కీల‌క బిల్లుల‌కు ఆమోదం తెలిపిన‌ట్లు స‌మాచ‌రం. ఈ క్ర‌మంలో విద్యాశాఖ‌లో IB సిలబస్ ప్రవేశ పెడతూ, విద్యార్ధుల‌కు అంతర్జాతీయ సౌకర్యాల కల్పనకు (LOI కు) ఆమోదం తెలిపారు. ఏపీ కాంట్రాక్ట్ ఉద్యోగులు క్ర‌మ‌బ‌ద్దీక‌ర‌ణ బిల్లు 2023 కి కేబినేట్ ఆమోదం తెలిపింది. అలాగే, ప్రభుత్వ ఉద్యోగులకు జీపీఎస్‌ అమలు బిల్లుకు ఏపీ మంత్రివ‌ర్గం ఆమోదం తెలిపింది.

ఇతర కీలక నిర్ణయాలు:

• ప్రభుత్వ ఉద్యోగి రిటైర్ అయ్యే సమయానికి ఇంటి స్థలం ఇవ్వడానికి కేబినెట్ ఆమోదం.
• ఉద్యోగుల పిల్లలకు ఆరోగ్య శ్రీ, ఫీజు రీ ఎంబర్స్‌మెంట్ అమలుకు ఆమోదం.
• జర్నలిస్టులకు ఇళ్ళ స్థలాలపై సూత్రప్రాయ ఆమోదం.
• వైద్య రంగంలో జీరో వేకెన్సీ పాలసీ అమలకు కేబినెట్ ఆమోదం.
• ఒంగోలు, ఏలూరు, విజయవాడ నర్సింగ్ కాలేజీల్లో పోస్టుల భర్తీకి ఆమోదం.
• ప్రైవేటు యూనివర్శిటీల చట్టంలో సవరణపై బిల్లుకు ఆమోదం తెలిపారు.
• కురుపాం ఇంజనీరింగ్ కాలేజీల్లో 50 శాతం సీట్లు గిరిజనులకు కేటాయించే ప్రతిపాదనకు ఆమోదం.
• పోలవరం ముంపు బాధితులకు 8424 ఇళ్ల నిర్మాణానికి ఆమోదం
• అసైన్డ్ భూముల క్రమబద్ధీకరణకు, పీఓటీ చట్ట సవరణకు ఆమోదం
• భూదాన్, గ్రామదాన్ చట్ట సవరణ బిల్లుకి ఆమోదం
• దేవాదాయ చట్ట సవరణ బిల్లుకి ఆమోదం

ఆరోగ్య సురక్ష పథకం కింద ఇంటింటికీ తిరిగి, ఆరోగ్య పరీక్షలను ఉచితంగా నిర్వహించాలని, నిర్ణయం తీసుకుంది. తీవ్ర వ్యాధులతో బాధ పడుతున్న వారికి, క్రమం తప్పకుండా వైద్య క్యాంపులు నిర్వహించనున్నారు. విలేజ్ క్లినిక్ లలో 162 రకాల మందులు, 18 రకాల పరీక్షలు అందుబాటులో ఉంచుతారు. ఈ క్ర‌మంలో సెప్టెంబరు 30 నుండి నవంబర్ 15 వరకూ ఈ క్యాంపులు నిర్వ‌హించ‌నున్నారు.

జాతీయ, అంతర్జాతీయ ప్రఖ్యాత యూనివర్శిటీలతో సంయుక్త సర్టిఫికేషన్‌ ఉండేలా, చట్ట సవరణ చేయాలని కేబినెట్ నిర్ణయం తీసుకుంది. విద్యార్థుల డిగ్రీలకు జాయింట్‌ సర్టిఫికేషన్‌ ఇవ్వాలని, ప్రైవేటు యూనివర్శిటీల్లో కూడా నాణ్యత ఉండేలా చర్యలు తీసుకోవాలని మంత్రివ‌ర్గం నిర్ణ‌యం తీసుకుంది. దీంతో, ఈ మార్పుల వల్ల చదువుకునే ప్రతీ విద్యార్థికి మంచి జరుగుతుందని, సీఎం జగన్ మోహన్ రెడ్డి అన్నారు. ఇక వీటితో పాటు ఇంకా ప‌లు అంశాల‌పై ఏపీ కేబినెట్ కీల‌క నిర్ణ‌యాలు తీసుకుంద‌ని స‌మాచారం.