Entrance Exams: దేశవ్యాప్తంగా ఎన్నికలు.. పలు ఎంట్రెన్స్ పరీక్షలు వాయిదా

దేశవ్యాప్తంగా సార్వత్రిక ఎన్నికలు జరగనున్న సంగతి తెలిసిందే. ఏప్రిల్ 19 నుండి మొదలై జూన్ 1 వరకు 7 విడతల్లో దేశవ్యాప్తంగా అసెంబ్లీ, పార్లమెంట్ ఎన్నికలు జరగనున్నాయి. ఈ ఎన్నికలకు సంబంధించిన షెడ్యూల్ కూడా ఇప్పటికే ఎన్నికల సంఘం విడుదల చేసింది. ప్రస్తుతం దేశవ్యాప్తంగా ఎన్నికల కోడ్ అమల్లో ఉంది. ఈ నేపథ్యంలో పలు పరీక్షల షెడ్యూల్ పై ఈ ఎన్నికల ప్రభావం పడనుంది. జేఈఈ మెయిన్స్, యుపిఎస్సీ ప్రిలిమ్స్, నీట్ పీజీ, కే సెట్, ఎమ్ హెచ్ టీ సెట్, టీఎస్ ఈఏపీసెట్, పాలీసెట్, సీఏ పరీక్షల నిర్వహణపై పడింది.

Also read: Andhra Pradesh: స్కూళ్లకు వేసవి సెలవులు ప్రకటించిన విద్యాశాఖ

జేఈఈ మెయిన్స్ 2024 పరీక్షను ఏప్రిల్ 4 నుండి 15 వరకు నిర్వహించాల్సిన ఈ పరీక్ష ఇప్పుడు ఏప్రిల్ 4 నుండి 12 వరకు జరగనున్నాయి. ఎంహెచ్టీ సెట్ (పీసీఎం, పీసీబీ) పరీక్షలు ఏప్రిల్ 16 నుండి 30 వరకు పీసీఎం పరీక్ష జరగాల్సి ఉండగా మే 2 నుండి 17 వరకు వాయిదా పడ్డాయి. పీసీబీ పరీక్ష కూడా ఏప్రిల్ 22 నుండి 30 వరకు జరగనుంది.

టీఎస్ ఈఏపీసెట్ 2024 పరీక్షలు ఏప్రిల్ 9, 10, 11, 12 తేదీల్లో ఉదయం 9 నుండి 12 వరకు, మధ్యాహ్నం 3 నుండి 6 వరకు రెండు సెషన్స్ లో జరగనున్నాయి. టీఎస్ పాలీసెట్ పరీక్షను మే 17న నిర్వహించాల్సి ఉండగా ఈ పరీక్ష మే 24 న ఉదయం 11 నుండి 12:30 వరకు నిర్వహించనున్నారు.

ఏపీ ఈఏపీసెట్ పరీక్ష కొత్తగా ప్రకటించిన షెడ్యూల్ ప్రకారం మే 16,22 తేదీల్లో జరగనుంది. యుపీఎస్సీ సివిల్ పరీక్షను మే 26న నిర్వహించాలి. కానీ ఈ పరీక్ష కొత్త షెడ్యూల్ ప్రకారం జూన్ 16న జరగనుంది. నీట్ పీజీ పరీక్షను జూన్ 23న నిర్వహించాల్సి ఉండగా.. ఈ పరీక్ష జులై 15 నాటికి వాయిదా పడే అవకాశం ఉంది.

సీఏ పరీక్ష గ్రూప్ 1 మే 3, 5,9 తేదీల్లో జరగనుండగా, గ్రూప్ 2 మే 11, 15, 17వ తేదీల్లో జరగనుంది. సీయూఈటి పరీక్ష మే 15, 31 తేదీల్లో జరగాల్సి ఉండగా.. పరీక్షలకు సంబంధించిన కొత్త షెడ్యూల్ ఇంకా ప్రకటించలేదు. ఇదిలా ఉండగా జేఈఈ అడ్వాన్స్, నీట్ యుజి, కే సెట్ పరీక్షా తేదీల్లో ఎలాంటి మార్పు లేదు.